Caffael prif bibell ddŵr

Mae ar y rhan fwyaf o ddatblygiadau newydd sydd â ffordd newydd angen prif bibell ddŵr newydd, a fydd yn cysylltu â'n rhwydwaith cyfredol. Bydd y brif bibell newydd yn gwasanaethu'r safle a chaiff pob eiddo ei gysylltu â'r brif bibell newydd trwy eu pibell gwasanaeth unigol ei hun.

Mae yna ddwy ffordd o fynd ati i ymgeisio am brif bibell ddŵr newydd:

• Hunan-osod lle bydd contractwr hunan-osod achrededig yn adeiladu’r brif bibell ar eich rhan yn hytrach na ni
• Cais am brif bibell ddŵr lle byddwn ni’n adeiladu’r brif bibell i chi

Mae’r dudalen hon yn amlinellu’r opsiwn cais am brif bibell ddŵr. Cliciwch yma am yr opsiwn hunan-osod.

Beth fydd y gwasanaeth yn ei ddarparu?

Mae caffael yn golygu taw Dŵr Cymru sy'n dylunio'r brif bibell ac yn ei gosod.

Bydd ein peirianwyr arbenigol yn gallu’ch tywys chi drwy'r broses gyfan, o ddylunio'r brif bibell newydd i'w gosod.

Os ydych chi'n caffael prif bibellau dŵr newydd gennym, mae’n bwysig nodi y bydd angen i chi gyflwyno cais am gysylltiad dŵr newydd ar gyfer pob eiddo o hyd.

Faint o amser bydd hyn yn ei gymryd?

Am fod pob cais yn wahanol, nid oes yna amserlen benodol. Pan fyddwch chi’n cyflwyno cais am y gwasanaeth hwn, bydd ein tîm yn cynnig brasamcan o'r amserlen ar eich cyfer.

Beth fydd y gost?

Mae dwy gost yn gysylltiedig â'r gwasanaeth hwn:

Ffi ymgeisio gychwynnol

Ffi o'r bron o £2,500+TAW na ellir ei had-dalu, i'w thalu adeg cyflwyno'r cais gan ddefnyddio cerdyn credyd neu ddebyd dilys yw hon. Pan fyddwn wedi cwblhau'r gwaith, byddwn ni'n tynnu'r ffi ymgeisio o'r swm cyfnewid, felly dim ond y gwahaniaeth y bydd angen ei dalu. Os dewiswch dalu trwy ddiffyg perthnasol, caiff y ffi ei had-dalu'n llawn.

Swm cyfnewid NEU ddiffyg perthnasol

Lle bo cynllun yn cael ei gyflawni gan Ddŵr Cymru, caiff yr incwm y bydd y datblygiad yn ei gynhyrchu i Ddŵr Cymru yn y dyfodol ei wrthbwyso yn erbyn cost cyflawni'r cynllun.

Mae dwy ffordd o dalu am hyn. Gellir gwneud hyn trwy swm cyfnewid – lle amcangyfrifir y refeniw y bydd y cynllun yn ei gynhyrchu i Ddŵr Cymru yn y dyfodol ac mae'r datblygwr yn talu unrhyw ddiffyg ar ffurf cyfandaliad; neu'r diffyg perthnasol – lle mae'r datblygwr yn ymgymryd i dalu'r gwir wahaniaeth yn flynyddol, wedi ei ategu gan ddarpariaeth bond.

Er enghraifft, os yw'r cynllun yn costio £10,000 i Ddŵr Cymru ei gyflawni, ond mae'n gwarantu refeniw o £8,000 i Ddŵr Cymru yn y dyfodol, yna bydd angen i'r datblygwr dalu'r gwahaniaeth o £2,000. Dim ond lle nad yw'r eiddo wedi ei heithrio rhag TAW y codir TAW ar y swm.

Mae'r ddau yn amrywio yn seiliedig ar anghenion unigryw pob datblygiad.

Am fanylion ein prisiau, darllenwch ein rhestr o daliadau yma.